金像獎2024丨《金手指》得到不配的榮譽不服氣　曾智華：梁朝偉演出個別場面更略嫌浮誇

一如大部分香港人，我肥碌近年對一切電視節目，包括各式「大騷」，已失卻興趣。

每年唯一能令小弟擔定凳仔由頭睇到尾的，只有香港電影金像獎頒獎典禮。

原因？第一、我乃堅貞影迷兼本土片Die Hard Fans；第二、屆屆出現的人物，絕少在其他電視節目現身，經常有驚喜；三、幕後製作團隊雖全部義工，但年年絞盡腦汁炮製賞心悅目內容，次次精采；四、最重要，想第一時間知道自己貼中幾多獎項。

▲ 劉嘉玲代梁朝偉領取金像獎最佳男主角獎。（陳慧安 攝）

前晚又開定紅酒、買定外賣，與肥妹老婆齊齊由七點半踩到尾。

仍然賞心悅目，極好看。

不過，好看還好看，大家當然仍會七嘴八舌批評獎項得主是否實至名歸。

最新影片推介：余香凝專訪

我與一眾影癡老友的結論—唔服！

先旨聲明，大家個個佩服今時今日仍肯投資天文數字拍電影的老闆，因實在風險太大，與收益絕對不成正比。另外，香港觀眾，有哪個不是梁朝偉粉絲？佢毫無疑問是個殿堂級演員。

不過．．．．．．不過乜？不過，《金手指》那有理由橫掃六項大獎？此片整個幕後團隊非常用心，人人看得出，但資深觀眾欣賞時，必感到導演及編劇，有極大心理負擔，野心勁高同時卻處處受制肘，搞到瓣瓣皆neither here nor there，不少場面力不從心，唔湯唔水！

而梁朝偉演出，亦未能由始至終有自然演繹，個別場面更略嫌浮誇。

結論就是，《金手指》得到不配的榮譽，唔服！

HKET App已全面升級，TOPick為大家推出一系列親子、健康、娛樂、港聞及休閒生活資訊及影片。立即下載︰https://onelink.to/f92q4m

追蹤TOPick WhatsApp頻道睇最新資訊︰http://tinyurl.com/3dtnw8f5